أشياء لازم الواحد يعملها قبل ما يوصل 18
الدخان و الأرجيله و لعب الشدة
الشرب
يزبط بنت
التاتو
أفلام ثقافية
يزور الشرطة
فيه عدد لا بأس به من الشباب والشابات ... أول الواحد ما يشم ريحة أباطه .. بكون عمل كل هاي الأشياء ... دخان سرقه من أبوه .. وأرجيله بشارع الجامعة بأول ليرتين بصيروا معه .. و شرب بالخرابات ... و زبط بنت مثله .. واقعة من تريلا ... و حط تاتو أو طبعة علكة .... على العضلات ... ولازم راح محلات انترنيت و شاف أفلام ثقافية ... وأكيد بكون مر على مركز شرطة بسبب هوشة أو تهمة ...
بالمقابل الأشياء الي المفروض الواحد يعملها .. أو يعود نفسه عليها قبل سن الــ 18 .. هي الأشياء الي صعب يتعود عليها على كبر
الصلاة
السباحة
القراءة
السفر
اللغة الانجليزية
تصليح اشي خربان أو ممارسة هواية مفيدة
الصلاة ما بدها نقاش ليش لازم قبل الــ 18 ... السباحة ممكن تكون فشخرة ... يعني ما فيه مية للشرب .. مش للسباحة ... بس السباحة مهمة كثير لأنها ممكن تحفظ حياة البني آدم نفسه .. أو بني آدم ثاني .. واذا ما تعلمتها قبل الــ 15 حتى .. بتكون راحت عليك ...
لازم الواحد يقرأ ... بس غير كتب المدرسة : الجغرافيا والتاريخ و علوم الأرض و الفيزياء .. ممكن رواية أو كتاب ديني أو كتاب شعر .. أو حتى مواضيع ترفيهية ...
فيه شباب و شابات بوصل عمر الواحد 20 سنة .. وبفكر عمان بالسويد والبترا باليمن ... طبعا بعد قصة التصويت على عجائب الدنيا اختلف الوضع ... مش غلط الواحد يسافر .. ضمن المنطقة اللي عايش فيها و يشوف أماكن ثانية ..السفر من أكثر التجارب اللي بتعلم فيها البني آدم .. واللي ما سافر .. لو حتى على المفرق ما بعرف اشي بالحياة
لازم كل واحد يتقن اللغة الانجليزية قد ما بقدر ... و يمارس اللغة بالحكي كمان مش بس بالكتابة .. بس بدون ما يعرط على صاحب الدكانه اللي جنب الدار انه البي بي سيه بدهم اياه مترجم ...
تصليح الأشياء الخربانه بتعطي الواحد ثقة .. و شعور بالمسؤولية والاعتماد على النفس ... ممكن الواحد يصلح الكمبيوتر
و ينزل ويندوز .. يصلح بسكليت ... أو بعض الاكترونيات أو يتعلم فوتوشوب أو فلاش بشكل احترافي ... بس ما يعمل مثل أخوي اللي حاول يصلح ساعة الحائط قبل 20 سنة .. ومنها ما مشت ولا ثانية لا لقدام ولا لورى
شكرا ملاقققققط .. و شكرا نورا ...
18 comments:
Brilliant :)
I have a feeling that this BBC translator is based on a true story???
مممم
جميل
انا تعلمت السباحة على 7
نصائحك طقع
：）
How did you come up with all this so fast?? Now my post look soooooooooo bad :P looool
Good points.. Salah is a must,as for swimming,true if it's not taught at young age it becomes also impossible to learn..I wish I can swim..
like sel3 said is "BBC translator" inspired by a true story ??
Well, thanks for doing the tag in record time..:D
مش عارفة عن الشرطة..ضروري يعني؟ ولا هاي بس للاولاد؟
يعني في امل تزبط هلا معي حتى بعد ما تجاوزت السن القانوية لدخول المخافر؟
لول على يشم اباطه
منيح اللي تغديت زمان
التصليح هوايتي
ما في اشي ما بصلحه
او بخربه
بس لازم تخرب عشان تتعلم تصلح
واللي بيخرب بترمية و ما بتجيب سيرة
ما هو خربان خربان
امجد شكرا جزيلا لانك امتعتنا و اثريت معلوماتنا
(نص اسرار الشباب صارت برة يمكن يمكن يغتالوك دير بالك
و شكرا على انك جاوبت التاغ
Sel3
لوووول
يعني .. بس أنا خليت القصة عالـ بي بي سي عشان تطلع حلوة
Qabbani
نيالك .. انا تعلمت من كم سنة .. بس مش عارف أتقنها
Noura
والله هيك طلعوا معي بسرعة .. بس أنا بعجبك بهاي السوالف .. عالسريع بطلع معي ...
قصة البي بي سيه .. صارت . بس أنا انا غيرت فيها شوي ... أنا أكثر واحد بنعرط عليه بالعالم ... لازم أكتب عن هالموضوع
Malaقـe6
الشرطة بس للأولاد .. البنات لأ ... انشاء الله عمرك ما بتزوري المخافر .. الا اذا صرتي صحفية .. و حبيتي تعملي تقرير عن السجون
احنا عندنا مصطلح "شم ريحة أباطه" يعني كناية عن البلوغ
واذا بتفكري حالك عرفتي اشي من أسرار الشاب غلطانه .. المخفي أعظم ... احكيلها يا سلع
دخان الحمد لله رقم قياسي على 17
شرطه طبعا مرة وحده لانو كان عمري 16 وداخل مقهى نت
هي تنين بواحد
اراجيل لا غنى عنها ولو معلم مالنا
بنات من وين يا حسرة بطلنا من المركز وانقطع النبع
بدايه مباركه ...والحبل عالجرار
36o0o0oR (^_^)
ما أنا كنت أعد بشمائلك وأنا بألف بالوست ... انسبايرد باي يوووووو
يعني بالعربي انته كنت ملهمي للبوست
كل هاي الأشياء بسيطة .. أوعى لأسمع عنك سمعة عاطلة بس
enta amjad elli kont bi mahjoob ? esmak zin* :$ ?
eza enta 7ram ykoon 3ndak blog w ma akra2lak maaaaaaaan :*oh:
Crimson^ s
أهلا و سهلا .. زي ما حكيت أنا الزنخ تاع محجوب :-) .. بس اللينك محطوط على التوقيع تاعي بمحجوب ..
ما عرفتك مين عدم المؤاخذه .. يا سيدي بتور المدونة بوجودك
اول شي كتير حلو البوست .. ومفيد طبعا ... جد الاشياء الي بيعملوها الشباب قبل سن ال 18 هي بالزبط نفس الاشياء الي انت زكرتها .. انا اصلا بشك انو في ناس بتتعلم الصلاة لأجل الصلاة او بتتعلم السباحة عشان ما تقول انا رايحة على المسبح وتوريك البيكيني او في ناس بتتعلم الانجليزي عشان لما تشوفك تحكيلها كم كلمة يعني انو هي بتعرف انجليزي وعاد هي لا بتعرف الخمسة من الطمسة ... او في ناس بسافرو بس عشان يحكو سافرنا .. النفاق دبحنا والمظاهر دبحتنا اكتر ... الله يهدي هالناس ...
وبعدين شو صار بالدنيا ؟؟؟؟؟؟؟؟
اسمك تغير؟؟ وين راح البسطار؟؟
جد انا اكتئبت ... وين الي كنت اقاهرك في سنين وعمري الي راحو؟؟ بعتو بسهولة؟؟؟؟؟؟؟؟؟؟؟؟؟ كم شلن جابلك ولا رجعتو على المزبلة لانو مو مستاهل؟؟
حزنت والله انا :)
نايس نيو نيم مان :)
:: برواز حلو وجديد بلمع عشان تحطو على الموقع يجملو بدل هالبسطار :) :: واحد بيقاهر
kalamak ya amjad dorar :) ...
....
note:
baraaa2 shufteee ba3 el Bostar !!hehe
razan shofet allah yerda 3leh .. bas besho bede a2ahro hal2 mo 3arfe .. btedabar :P
ana kont Osama^
big fan man :P
kwais eno ndalait 3al blog accedently
Sweetlikesunset
البسطار ما زال الشعار الدائم ... كوبي رايتس ... بس العنوان تغير .. أنا بحب أغير العنوان لأنه انعكاس للحالة النفسية .. وللوضع الراهن
شكرا عالبرواز .. خليه بحط فيه صور عرس أخوي الصغير
vagueraz
أهلا رزان .. والله ما بعته .. بعده الشعار الدائم ..
و بلاش تنكشي فيها وتظل مستلميتني
Osama
و هسع شو صرت ؟ يا
خوف قلبي بعدك أسامة :-) أهلا و سهلا .. و مسرور برؤيتك هون .. وانشاء الله جاييك عالبلوق أشرب قهوه .. حضر بريق شاي و عشا
عمري حكيت عنك سويت بسطار؟؟؟ عمري؟؟
كل يوم بتسميني شي .. عمو الله يسعدك انا سويت لايك ارووووووووووووز .. يعني روزة حمرا حلوة ... مو غروب الشمس يا ساتر ...
والبرواز خليه لعرسك مو لعرس اخوك ..
looool @ طبعة علكة, actually i guess all of us have tried it lol
bs i really liked the idea of the salah w reading ,really great ..
sweetlikearose:
خلص عموو ما راح أحكي سويت ولا عسل و لا قشطه .. و خذي البرواز حطي فيه صورة البسطار و علقيها بغرفتك
:-)
ĐàŋdŎöŅёH
أكيد الطبعة أحلى من الوشم :-)
حلوة كتير ........يشم اباطه لووووووووول بس الرساله مفهومه
Post a Comment